СВЕЧЕН ЧАС ЗА НОВИТЕ СТУДЕНТИ НА УТМС
Во преполната сала на Амфитеатарот на Универзитетот за туризам и менаџмент во Скопје, на шеснаесетти овој месец со одржувањето на свечениот час, и официјално се означи почетокот на академската 2013/14 година, за ново запишаните студенти на овој Универзитет. На свеченоста покрај идните академски граѓани, кои одлучија своето образование да го продолжат на некој од седумтте Факултети кои функционираат во рамките на Универзитетот за туризам и менаџмент, присуствуваа и повеќе значајни личности од јавниот и културниот живот на Република Македонија. Присутните студенти и гости, ги поздрави Ректорот на Универзитетот за туризам и менаџмент Проф. Д-р Аце Миленковски, кој им посака топло добре дојде на идните студенти, во како што рече храмот на знаењето, додека на членовите од Советодавните одбори, им се заблагодари за нивното досегашно несебично залагање за подобрување на работата на УТМС.
Образложувајќи го системот на работа на Универзитетот, Ректорот Миленковски истакна дека токму начинот и методите го прават овој Универзитет да биде не само најдобар, туку и посебен, бидејќи добиените дипломи од УТМС, се признаени секаде во Европа и светот, за што говорат, како што рече многуте примери на дипломирани студенти кои денес веќе работат во престижни институции ширум светот. Но, за да се постигне сето тоа рече Миленковски, потребно е не само знаење кое студентите го добиваат од наставниот кадар на УТМС, туку и воспоставената практика за исполнување на практична настава, која студентите од овој Универзитет веќе неколку години наназад имаат можност да ја исполнуваат во престижни хотели во Грција и Турција.
За сето тоа да биде уште поуспешно, потенцираше Ректорот Проф. Д-р Аце Миленковски, несебично придонесува и членството на овој Универзитет во Светската туристичка организација, преку која оваа институција и секако студентите имаат можност да бидат во дослух со најновите збиднувања и текови во туризмот во светот.
По завршувањето на излагањето на Ректорот на УТМС, од страна на стручните служби, на ново запишаните студенти на овој Универзитет им беа доделени идентификациски листи за електронски индекси.
zapochna-novata-akademska-godina-na-univerzitetot-za-turizam-i-menadjment